الأربعاء، 25 يونيو 2008

الحلقة الرابعة

رحت أوصل التاريخ يرتاح ويحفظلناالاحداث بعد التدوين ..وإحنا فى السكة مرينا على شريان النيل وشمينا ريحة فراته معطرة المكان بتقولك مرحباً يا أصيل ..أصله جاى محمل فرات من خير الارض ومن كل معدن ثمين ..وهو بيجرى الله عليه حساس ورقيق كأنه بيستخلص من خير الارض وكل قطرة فيه على مهلها تحيك
بتقولك
يامصرى ..إشرب منى وسمى وربنا يبارك فيك ويشفيك .
وقلت لشيخنا التاريخ
سجل معاك دعوة النيل لينا
والحقيقة ان شيخنا التاريخ مش مستنى بياخد مدد حبره من النيل وبيكتب كل التفاصيل
بص فى عينى وقال لى
انا شايف فى عنيكى خط شريان النيل بيجرى حب للأرض ولما بتغمضى بتحنى عليه
ورجع يكتب من تانى ..وأصلك يامصرى بتحب نيلك ومنه بتستمد مواويلك وصدق اللى قال مصر والمصريين هبة النيل
ووصلت شيخنا التاريخ ومنستش أبص على بيته العتيق وجدرانه اللى مليانة قصص وحواديت وانا فى السكة راجعة كان حل الليل وعلى جنب سمعت بحبحة قمت قربت وبصيت لقيت العفريت اللى كان شغلنى وبيتصنت على التاريخ وعرفت من كلامه ان أسمه (دهمان) بيتكلم مع عفريت تانى أسمه (قماقم)
قال قماقم ..ايه يادهمان بعتلى آجى ليه
قال دهمان .. روح وبلغ عمارة إن دى الحارة مليانة حواديت وقوله ان الحارة فيها بشارة ظهر فيها أصول وانتماء وعادات وتقاليد وفهم عالى وولاد فى الدايرة بتتربى على العقيدة والارتباط بالجذور وعمالين يبنوا قلاع وحصون مع التاريخ ..
قول لعمارة ان عم رمزى راجل حدق ابتسامته هادية بس عزمته حديد ماتلين
قال قماقم
ايه ده يادهمان انت ليه عاملهم ألف حساب
قال دهمان .. أصلك مشفتهمش ومسمعتهمش دول حافظين التاريخ لدرجة انهم عرفوا اسمنا بالمصرى القديم انه (بوبع)
قال قماقم ..طيب انت مش ناوى تيجى معايا ولا ايه ثم انت بعت طلبتنى ليه
سكت دهمان
مالك يادهمان سكت ليه
أصلى مخبيش عليك ياقماقم المصريين دول فيهم حاجة تشدك تخليك تحب عيشتهم رغم هموهم ومشاكلهم فيهم حاجة تخليك تتعاطف مع قلوبهم وأحوالهم ..وبعدين الارض هنا شرحة وبرحة مفيش دوشة ولا هوسة ولاناطحات سحاب هنا ترجع لأيام زمان تسمع وتشوف وصعب حد يعثر عليك
انما فى بلد عمارة احنا مهلوكين ومرهقين ومتشافين أصلهم فاضيين عمالين يدوروا على أى جذور يقلعوها واصول يدمروها والانساب ويخلطوها الحقيقة هلكوا قدراتنا طالعين نازلين ومتسمعش غير هلوسة وضجيج وأجناس كتير بترغى وكل شوية يطلبونا علشان نسخرلهم المستحيل..أماهنا انا مرتاح بسمع وبشوف ومعاهم بطوف وكفاية عليكم الاخبار
قال قماقم ..ألالالا..انت بقيت تتكلم مصرى ولاايه دا لو عمارة عرف الكلام ده عنك هتكون نهايتك
ضحك دهمان وقال
أهى دى بلد عمارة نسوا يتعلموها انهم ازاى يحرقوا العفاريت انما الامم دى بإيمان وكلمات من الله اتعلموها ممكن يقضوا على مملكة عفاريت كاملة ..ياعم اسكت عمارة ده هيصة وزمبليطة وممكن من نفخة واحدة من الامم دى يطير أو تكبيرة بصدق تخليه مفيش ..وانا هنا ياقماقم عاوز اسمع المصريين كمان ..واكتم سرى وكفاية انى مخلص فى عملى وبسمع الاخبار وبطيرلك الاسرار
وهنا بدأ يطلع النهار
فقال دهمان أسيبك بقى ياأعز الاصدقاء
هتروح على فين يا دهمان
مضطر أروح اقف مع الناس فى طابور العيش سامع ان فى الطوابير دى فيه حكايات لها العجب على حاجات ملهاش سبب ..وإن فيه هناك ناس بتموت علشان الرغيف وياريت فى الاخر كله بيتاكل الاانك تمشى فى الشوارع تلاقى أغلبه مرمى على الرصيف ولو ان المصرى يعرف سر الرغيف مكنش قلق منامة ولا ضيع عليه أيامه لو عرف انه ممكن يأكل نصه بقناعة وتوفير وبباقى ثمنه يعمر ويشيد ويشيل بس ياعينى تلاقى منهم ناس كتير ناسية القضايا المهمة وماشية ورا بطنها وطلبتها بهمة
وهى دى فرصة عمارة انه يدخل على سوق الجاعنين وعمره مادخل على ناس صايمين أو قانعين بيكتفوا بالقليل ..عمارة بيحب الجعان والولهان
اللى عاوز كل حاجة ومفيش فى ايده اى حاجة ومع كده بيحلم بكل حاجة
والحارة دى بيظهر فيها بدايات الصح هناك عند الدايرة يلتفوا حولين عم رمزى والتاريخ .

ومشت راوية بشويش بشويش ..هوسسسسسسسسسسسسسسس

يا ترى رايحة فين ؟

















هناك 16 تعليقًا:

عروسة ننوسة يقول...

امل ....دعينى احيكى على البوست....الحلقة حلوة جدا كمان انا معجبة جدا بكتابتك باللغة العربيه
اتمنى منك المزيد
بشكرك

rovy يقول...

اعجبنى جدا اسلوبك فى الكتابه واحساسك العميق الاصيل بتاريخنا و حضارتنا و مصرنا و شعبها ..
حقيقى بأحيكى و مستنيه اتابع معاكى باقى الحكايه .. ان شاء الله رب العالمين
تقديرى و تحياتى
rovy

عايش... ولكن !!!! يقول...

امل
تعرفى انك قدرتى تجزبى انتباهى
والحلقه بجد جامده جدا
فى انتظار ماهو قادم
تحياتى
علاء

محمد الهادى غانم يقول...

انك لا تعلمي لقد شممت فعلا الروائح النادرة لمحبي التاريخ وعبق الماضي .
من النادر ان تجدي من يشعرك بعظمة النيل وحبه لنا وفضل الله علينا به .
نعمه علينا ان نكون لنا تاريخ نتمسك به ولنا جذور لابد ان نتمسك بها ولا نكون مجرد اوراق اشجار تتطاير وتهبط علي الأرض وندهس بالأقدام .
اسلوبك رائع

المستنصر بالله يقول...

كتاباتك جميله فعلا
بتاخدناا للحظات لعالم تانى خالص
احييك بشدة عليها

مع خالص احتراماتى

RaRa يقول...

جميل انك تعبرى عن التاريخ فى صورة حلقات
والحلقة جامده اوى ومستنية منك باقى الحلقة
الا صحيح هى رايحة فين ؟؟
منتظره الباقى مش تتأخى علينا

blue-wave يقول...

كتاباتك تحفه بجد
تحياتى

Maha Shahen يقول...

عارفه فى وصفك لمصر وان مفيهاش ناطحات سحاب وو حسيت انك بتوصفى الارياف وبأن الدول الاوربيه العامره بناطحات السحاب الخانقه هى المدينه اللي بنهرب منها للريف ونستمتع بالطبيعه الخلابه فيه
عمرى ما بشبع من الحلقات وبتمنى لو تطول ساعات مش دقايق بس انا في انتظار الحلقه الجايه ويا ريتك دايما تنبهينى الله يكرمك لأنى لما بدخل مره واتنين مش بلاقى حلقه جديده بسكن في مدونتى ولا اخرج عنها
واعزرينى لو اتاخرت او هتاخر بس هتلاقينى دايما متابعه لأن اسلوبك جميل في الكتابه وبيتخلله شيء من نغم مخفى بين السطور
تقبلى تحياتى واعجابى الزائد
نور

غير معرف يقول...

نحن اصحاب ثورة حقيقية , نقف بالطوابير الطويلة لاجل رغيف عيش ونقتتل لاجله ونعود نبحث عن الغموس ولا نجد حتى الزيت والخل
لاجل ذلك وذاك لا نلقى بالا للقضايا الهامة ونفكر كيف تعود القدس عربية لوجه الله ونموت ونموت وتحيا الامة العربية كغثاء السيل
مع خالص محبتى لقلمك
اميمة عز الدين

تايه في وسط البلد يقول...

برافو امل بجد

انك تقدري تشيدي عالم موازي للعالم القبيح من حولنا فهي مقدرة ليست هينة

اقولك علي حاجة تانية

انتي مش محتاجة اكتر من النظرة العميقة المتأنية في الاحوال لكي تتكامل المخطوطة

تحياتي وفي انتظار الجديد

أمل فتحى عزت يقول...

السلام عليكم
أشكر كل الاخوة والاخوات الذين شاركوا معى الرأى فى هذه الحلقة
********************
تايه فى وسط البلد
شكراً جزيلا على تعليقك ولمسك نقطة هامة أحاول تجنبها أثناء سردى للأحداث وهى النظرة المتأنية فى الاحوال
ولكى تكون اجابتى معك واضحة فأنى بقرب لك التايهة فى وسط النظرة العميقة والمتأنية فى الاحوال والتى لانكف عنها ليل نهار وتعج بها الصحف والمدونات وأصبحت حديثنا فى الصباح والمساء
أحاول ان أجدد أشياء حولنا تحرك ولو قليلا من الواقع المرير حولنابكل ما يحمل وقد نرى جماليات افتقدناها فى بلدنا وحياتنا وسط الزحام
ولك خالص تحياتى

ذو النون المصري يقول...

اسعدني وجودي في الجزء الثالث
لكن ليه متوقفه عن الكتابه في فنون؟؟؟؟؟؟؟؟؟؟
مدونه فكرتها ممتازه ياريت بلاش انقطاع طويل فيها
تحياتي

Unknown يقول...

تحيتي لك
يشرقني دوتك لحضور مدونتي وزيارتها وترك لمساتك عليها..
أتمنى تلبية الدعوة وأعدك أن لا تكون هذه المرة الوحيدة التي أزور بها المدونة
كل الود وفائق الإحترام والتحية
مدونتي هنا
http://kanyatklam.blogspot.com/

tarek alghnam يقول...

الرائعة امل
شربت من نهر ابداعك
فى نهر النيل عندك وعلى ضقاقه
عشت مع التاريخ
وعشت مع حكاياتك وزاد ظمأى لها
تقبلى تحياتى
يامن نظمتى لنا التاريخ من جديد
تحياتى

rovy يقول...

امل هى الحمله فين
يا ريت تعلنى هى فى اى مدونه عندك

انا طبعا مضطره ادور
يارب اوصل

تحياتى

rovy

YaQeeN يقول...

اااااااااه شفتى بقى..
جه دورى علشان أشوف الحلقه اللى مش قادره أوصفها بجد..
تعمقت فيها بطريقه غير معقوله..


ماما امل..
أنا بجد حبيتك زى ما حبيت هذه الحكايا..
شدتينى من حيث لا ادرى ولا أعلم..


تقبلى تحياتى..